「老母」進化論

對我來講，今天是個大日子。終於由小童、少女、女友、妻子、母親進化為「老母」或「老媽子」；就算不想認還須認。見證著這個重要里程碑的，是一件驚天地、泣鬼神、(家裏)前無古人、(斷估)後無來者、核核突突、今生難忘的可怕經歷。

請勿自作聰明以為是「停經」、「一夜白頭」或「家庭遭逢劇變」。「停經」會由「更年期」過渡，又是女人必經，又何需大驚小怪呢？「一夜白頭」如打扮配襯得宜，又不一定會核核突突。「家庭遭逢劇變」當然會令人今生難忘，但可怕極也不會核突兼同「老母」有關係。

我說的可怕經歷，是同上面那個Bose Companion 紙盒有關。在這紙盒裏安息中的是一隻身長一尺多的死老鼠。對唔住，我同佢生前素未謀面，佢嘅死更加同我無關。家中絕無放老鼠藥，我更加無咁勇及兇殘，可以徒手或用兇器宰殺佢。

最可悲就是，家中男丁無個敢自告奮勇去收屍，更枉論清理案發現場及處理屍體。最可恨的是，終於有男丁肯勉為其難往後花園收屍，但當行到離屍七尺，看到發黑僵直、腸穿肚爛、烏蠅蛆蟲滿蓋、屍臭惡頂、死狀恐怖的老鼠大哥時，他就忍不住要往屋裏直奔。

想到家中兒子身嬌玉貴、長期病患、兼過度過敏，怕核突、怕肉酸、怕死、怕臭的媽媽，唯有硬著頭皮、一步一驚心的踏向可怕、黑暗的不歸路。雖然手戴雙重手套、面蓋豬咀口罩、腳踏勞動水靴、配備紙盒、膠袋、紙皮、漂白水，但仍然思疑是否漏了「哥士的」？

原來收屍的過程比我想像中艱巨得多。屍體看似嬌小，原來變成僵屍腐屍後會變重，配備的紙皮又不夠硬，不能輕易將屍體夾起，放到空盒的裹屍布內。要我徒手拾起屍體，我真係打死都唔制。幾經辛苦、紮「行」馬、用盡陰力，才勉强完成這個神聖的任務。

最憎、最痛恨就是完事後，所有男丁齊集歡呼，給這個老母一個「V」手勢，口中狂說我「偉大」，還要嚷著要看屍首的大頭相。真想狠狠的說句，為甚麼要「V」你老母？處理屍體是個神聖莊嚴的差事，就算是棄屍都是屍，我們都要尊重牠的死相，既然已蓋好棺釘了蓋，就算是多好奇，也無理由要你老母開棺，給你們幾個貪生怕死的無恥之徒開心。最怕你們不堪死狀之驚嚇程度，忍不住驚到賴尿，最後善後的又不是我？「執」屍時又唔見你地話要影相，等人搞掂晒時你地就口響要睇相。我警句你地呀，我好火滾呀，千期唔好「V」我，我「V」翻你地嫁!

最最最無癮，就是以前口痕，在別人的部落格裏扮「偽辣媽」，話由女人進化為「老母」，其中一個里程碑，就是夠胆捉老鼠。還口響說，如果在男人面前捉老鼠，男人就算口中說佩服偉大，心中都會對你慾望全無，因為你已經淪為「老母」了。

那那那，都叫你地唔好「V」我囉，仲「V」？