愛情神話口痕報告

家無長物，最多的要算是書了。在抵加的第216天，老婦人仍在整理由香港運來的書，發現原來有不少有關神話的書。

回想起，數年前為完成口頭報告，
臨急就章光速完成了一貫超低智簡
報，但勝在搞笑好玩，自己開心就
好了。別人的眼光咀臉，我睇唔
到、我睇唔到、我睇唔到……….

當時我選了 Cupid and Psyche 這個神話故事來做口頭報告。其實都看過好多愛情神話，但係最後都係選擇 Cupid and Psyche E個神話戀愛故事來做報告，因為其實都無得好選。單戀、自戀好傷感，人獸戀、孌童癖又好變態，强搶民女，都唔算戀愛吖﹗戀父、戀母、戀子、戀女，戀兄、戀妹亂曬倫，亂到我都唔想用來做報告，婚外情、多角戀，又太過複雜，我接受唔到囉﹗同性戀、自己又有Bias，無 Feel 做不好。除咗無得選擇的原因外，個故事本身都有「必殺技」。首先係 Cupid 同 Psyche 都係俊男美女，當然係掂啦﹗如果由我做 Psyche，搵鬼睇咩﹗而且，又有happy ending 喎，好過喊苦喊忽，生離死別，鬼死咁慘情﹗

做人唔好鋒芒太露

Venus

Psyche 份人就係衰太過高調。最初搞到D人以為係美神維納斯，降臨凡間，又以為佢係新維納斯。喂，換轉第個都會嬲，原本係人都話維納斯最「索」，突然間被一個凡間女子搶晒風頭，條氣緊係唔順啦﹗連 Psyche 自己都知道衰甚麼：在佢父母送佢上山時，佢自己都話：「當百姓們崇拜我，話我係新的維納斯時，你們就應該哭泣啦，你們就應該悲傷啦。因為現在我已經明白，我之所以到 E 個地步，就係為咗維納斯E個名啦。」所以我成日話：「有早知，就無乞兒啦﹗」但係佢都唔知衰，到佢兩個家姐去到佢屋企時，竟然一入門口就 Show 個寶庫比佢地睇，又送好多金銀珠寶比佢地，搞到兩個衰家姐，鬼死咁妒忌，頓起「Y」念。所以佢就係衰 show off 囉﹗

Psyche is showing her sisters the gifts from Cupid

衰心軟

嗰個 Cupid 又真係自己攞嚟衰，成日衰心軟。明知老婆兩個家姐來者不善，就算個老婆點「冤」，都米鬼睬佢啦，點都唔好比佢見到兩個衰家姐。所以之後嘅情節，都係Cupid 抵死，自己攞嚟攪。 都唔怪得曬個老婆。

千期唔好挑戰女人的好奇心

其實都無奶油，Cupid 喺維納斯、希拉D女人堆中大，無可能唔知道女人 D 好奇心、疑心嗰D衰嘢。無端端唔比個老婆見佢，就算有苦衷，都米已成坎啦，就算唔可以見到個樣，都可以講得清晰實質一D，最衰就係講D唔講D，等人估吓估吓咁。都好難怪個老婆妄想喎﹗你日頭就唔見人，唔知走咗去邊，到未天光，又雞咁腳鬆人，緊係思疑你有「景滾」啦﹗

做神做人，最緊要好命

其實我成日都話，無論做神又好，做人又好，最緊要好命。好似 Psyche 咁，每次接到惡家婆D 辣手 Order，每次都會有 D 有形無形的力量，主動出現來幫佢。所以話，最緊要死好命。

無臉見人

點解Cupid唔比個老婆見佢個樣啫？其實喺好多故仔裏面，新娘都被禁止唔准見佢老公或問佢嘅名。好似古代斯巴逹的新郎，有一個時期，是不許見他的妻子的。這種禁止，喺我地E家睇嚟好似好奇怪咁，其實在當時係好流行的一種風俗。第二，思疑Cupid 驚比個阿媽維納斯知道，咁就死啦﹗衰仔呀﹗叫你搞掂個仇家，你竟然比個女仔搞掂咗，如果我個仔係咁，我都會嬲到拆天啦。咁E個理由都言之成理。

不過，我估好難瞞得過維納斯好耐。晚晚個仔唔見人，遲早都會有懷疑，到時咪一樣穿煲﹗不過，Cupid個樣咁得，當Psyche見到佢時，簡直答曬糖，其實佢應該早D比個老婆見吓佢個靚仔樣，Psyche肯定勁啉佢，話唔定仲聽教聽話，唔會攪到之後一鑊粥添。

Pan & Psyche

Zeues

轉死性

有一點，我覺得有D奇怪，就係喺希腊神話中，宙斯同Pan都好好色，見到靚女通常都唔會放過。點解喺個故仔裏面，佢地兩個見到Psyche，唔單止唔起痰，仲同情及幫Psyche添。你話係唔係好奇怪呢？

Always Naïve

喺個故事裏面，講到個女主角鬼死咁naïve，其實係唔係真係咁naïve呢？例如，Cupid離開佢之後，Psyche分別見到兩個姐姐，都存心向佢地報復，話 Cupid要娶佢地為妻，話西風會送佢地上山頂的，最後搞到兩個姐姐跌鬼死。由此見得佢唔係always naïve，都好有心計。知道兩個姐姐都對自己的婚姻現狀好不滿，引佢地上當。咁我就思疑佢成日都話要死，但每次跳海跳崖時，又咁啱有神仙或有神力的植物、動物會出現，同情及幫佢，我就唔信咁啱啦，我諗佢都肯博同情居多。個個都話維納斯喺個神話故事中，好鬼死衰，咁既然個個女主角都係有仇必報的，咁維納斯咁憎佢，向佢斯以懲戒，一點都唔奇怪囉。

一入「維」門深似海

其實我都好期望有人會寫Cupid 同Psyche 正式成婚入門之後的翻外篇。大家想像一下，雖然有庙斯擺平件事，如果你係維納斯E個惡家婆，等佢入咗門之後，新仇舊恨喎，點都會玩翻舖先﹗如果我之前的估計無錯，Psyche其實一D都唔好蝦。成為神仙，可以會更加「hill 屎」。唔使估啦，最煩都係Cupid，夾係兩個女人中間，一定會搞到家嘈屋閉啦﹗所以如果有朝一日，出E本Cupid同Psyche婚後傳，我一定會買囉。

同場加映

其實睇E個神話故事，都好著數。睇一個故仔，好似同場加影粵語長片、民間傳奇、童話故事一樣。維納斯個角色，好似惡家婆黃曼妮、又好似Snow White 裏面嘅邪惡皇后、又似Cinderella 裏面嘅惡後母。Psyche 個角色，有D似民間傳奇裏面專比惡家婆蝦嘅心抱，又有D似Cinderella, Snow White, Beauty and the Beast 中的美女。Psyche 兩個妒忌嘅家姐，又好似Cinderella嘅兩個姐姐。喺故事中幫過Psyche嘅小螞蟻、野草、神鷹、就好似Cinderalla、Enchanted 中嘅小動物啦﹗而故事中的三頭狗，又好似Harry Potter 裏面嘅Fluffy。

人生交叉點

其實唔記得以前套人生交叉點，有無做過類似嘅TOPIC。其實我好思疑，之前 Psyche又話自己好愛個老公，如果Cupid 唔係咁靚仔，如果PSYCHE 見到嘅老公係又老又醜，如果佢見到嘅真係怪獸，咁佢會點樣做先？佢會選擇隊冧佢呀定係好似故事中嘅情節，一樣咁親吻佢呢？咁其實Psyche有幾愛 Cupid 呢?

神話篇 = 邪惡篇？

我有一個疑問：神話裏面的神，唔係應該優勝過我地凡人咩？點解Olympus裏面充滿住亂倫、慾望、血腥同埋罪惡呢，點解會比普通人的世界更加之混亂呢？無他的，其實神話裏面的神，係依附住人而存在的，神話的世界正係我地人類慾望的投射。所以，神話可以揭露人類心底的私密慾望，表逹人類的情感，這份情感可能很光明，可能很黒暗。其實正路來講，我地看過神話人物中的黑暗面、邪惡的所作所為，我們是否會從中得到反思，警醒到自己呢？定係會觸發自己的獸性，令自己淫邪的一面曝光呢？咁就要看大家的思維和造化啦﹗咁社會上發生咁多淫邪、亂倫、無法無天的罪惡，是否D人有可能看得神話故事多呢？